Montag, 26. März 2012

Vizito al la insulo Föhr (Feb. 2012)


Vendrede, je la 23a de Februaro, sur nia malgranda insulo regis bela vetero. Tia, kian oni priskribas en lernolibroj kaj turismaj informiloj: Suno brilas, venteto blovetas, maro bruetas. Tio estis bona signalo por la sabato, je kiu mi volis veturi al la najbara insulo Föhr por renkonti amikon.

Tiam mi staris sabate en la haveno kaj tremetis pro frosto. La temperaturo malkreskis ĝis iom super nulo grado, nebulo limigis la vidon. La pramon, kiu staris aŭ iris eble ducent metrojn antaŭ la haveno, mi ne povis vidi. Ties pozicio estis videbla per la ŝipa itiner-montrilo (vessel tracker) de la retejo de la prama entrepreno, kiun mi vidigis sur mia smartfono. Fine laŭtparolila informo: La pramo veturos je la deka horo. Duonhora malfruo.

Post malgranda aventuro, pri kiu mi ne volas raporti ĉi tie, mi atingis la havenon de Wyk sur Föhr kaj renkontis mian amikon, kiu bezonis helpon pri la tekstoprogramo WORD. Posttagmeze mi ekiris reen al la haveno. Jen mia amiko atentigis min pri cikonio: En ĝardeno apud la strato loĝas pluraj cikonioj! Mi neniel pensus vidi cikoniojn en Februaro sur nordfrisa insulo! Ĉar oni manĝigas ilin, iuj restas eĉ dum la tuta vintro en tiu hejmo.



Alvenas la pramo, kiu reportos min al Amrum.



Nun, posttagmeze, la vetero denove malboniĝis. Tamen tiu grizeta, nebuleca vido ravas la rigardanton:



Alveno.

Hodiaŭ estas dimanĉo. Suno brilas, venteto blovetas, maro bruetas.



Kunmetaĵoj:

al·ven·i | atent·ig·i | blov·et·i | bru·et·i | de·nov·e | du·cent | du·on·hor·o | ek·ir·i | griz·et·a | inform·il·o | laŭt·parol·il·o | lern·o·libr·o | lim·ig·i | mal·bon·iĝ·i | mal·fru·o | mal·grand·a | mal·kresk·i | manĝ·ig·i | montr·il·o | nebul·ec·a | nord·fris·a | pri·skrib·i | post·tag·mez·e | re·e·n | re·port·i | ret·ej·o | rigard·ant·o | tekst·o·program·o | trem·et·i | vent·et·o | vid·ebl·a | vid·ig·i

Montag, 19. März 2012

La lasta marrabisto sur Amrum

Insulo en la vasteco de la maro, maristoj, fiŝistoj, ... marrabistoj. Por vivteni sin, la homoj sur insuloj ne estis ĉiam tute honestaj. Jes, iam kaj tiam oni  ŝtelis (onidire ŝtelas) la varojn, kiujn la maroj alflosigas de sur ŝipoj batalantaj kontr ventegoj. 


Eble, vere nur eble, ĉi tie iam loĝis marrabistoj. Ili jam delonge ne plu venas ĉi tien. Iun el la kamaradoj ili forgesis ant 200 jaroj, kaj li atendas ilian revenon. Li volas hejmen ... telefoni. 
Kunmetaĵoj:
al·flos·ig·i batal·ant·a | de·long·e | fiŝ·ist·o | mar·ist·o | mar·rab·ist·o | oni·dir·e | re·ven·o | vast·ec·o | vent·eg·o | viv·ten·i

Montag, 12. März 2012

La ekspoziejo »naturrum Hornborgasjön«

Ta-taa! Mia sveda amiko Karl-Gustav el Skövde havas la honoron publikigi la unua gast-artikolon por mia blogo. 

Pasintjare (2011) mi vizitis la ekspoziejon »naturrum« ĉe la orienta bordo de la lago »Hornborgasjön« ne for de la urbo Falköping. (Vidu la guglo-mapon.)


La Vizitanto-Centro »naturrum Hornborgasjön« estis konstruita en 1986 kunlige kun la restaŭrado de la lago, al proksimume la samaj kondiĉoj kiel antaŭ la drenado de la lago. Troviĝas 29 vizitanto-centroj en Svedujo, ĉiuj bele lokitaj apud naciaj parkoj aŭ natur-rezervejoj. En la vizitanto-centroj oni proponas al la vizitanto partopreni en diversaj aranĝoj por akiri pli profundan konon pri la bestoj, flaŭro, geologio kaj kultura historio, kiu formis la regionon.


La personaro ĉe »naturrum« ĉiam pretas informi vin pri la aktualaj programoj. La samaj informoj estas legeblaj en montrofenestro ĉe la enirejo.


Ekspozicio pri la lago Hornborgasjön

En la Vizitanto-Centro »Hornborgasjön« oni trovos ekspozicion pri la lago. Oni rajtas senkoste utiligi la fiksajn lornojn kaj spekti filmojn pri la lago. La filmo prezentas la faŭnon ĉirkaŭ kaj en la lago. Tiu, kiu volas esplori la ĉirkaŭaĵon, povas sekvi preparitajn vojetojn, pri kiuj troviĝas informofolioj en la akceptejo kaj sur informo-tabuloj je la komenco de la padoj. 


Pri la agadoj kaj programoj ĉe »naturum Hornborgasjön« respondecas la Gubernia Estraro de Västra Götaland kun subvencia financado de la Naturprotektanta Aŭtoritato de Svedio. 

La birdo de la monato (Månadens fågel)

Dum tiu vizito ni observis ĉasantan fiŝaglon, kiu iam kaj tiam haltigis sian flugon kaj komencis ŝvebflugi super la akvo. Bedaŭrinde ĝi ne faris plonĝon en la akvon. Tamen, sur afiŝo estis eble legi informojn pri la fiŝaglo.

Fiŝaglo (Pandion haliaetus)
Fiŝaglo estas migranta fiŝkaptanta birdo, kiu flugas longajn distancojn. La fiŝaglo estas trovata ĉe la sveda marbordo kaj ĉe lagoj ekde marto / aprilo ĝis septembro. Ĝi pasigas la vintron en Afriko. La ino demetas ĝis tri ovoj. La ovoj estas kovataj de ambaŭ gepatroj. Dum la unua monato la ino restas kun la idoj en la nesto, dum la vira fiŝaglo kaptas fiŝojn. Dum la ĉasado la fiŝaglo ofte ŝvebflugas en la aero, kiam ĝi esplorrigardas por trovi predon. Kiam ĝi trovas fiŝon, ĝi plonĝas je kruta angulo en la akvon kaj prenas sian predon per siaj ungegoj.


Ĉu vi scias? 
  • ke, la plej maljuna fiŝaglo, pri kiu oni scias, havis 26 jarojn.
  • ke en Svedujo la fiŝaglo estas leĝe protektita ekde 1920. 
  • ke, la fiŝaglo estas simbolo por la graflando Södermanland.
  • ke laŭ folkloro sur iuj insuloj en la Pacifiko oni asertas, ke estis la fiŝaglo, kiu ekis la unuan fajron kaj kune kun sturnoj alportis ĝin al la tero.

La dancado de la gruoj

Estis ege bela vetero, kaj ni faris ekskurson al belvedera observejo iom for de la Vizito-Centro. Sur la tegmento de tiu konstruaĵo troviĝas vento-sekvanta figuro en la formo de gruo. Printempe la lago estas vizitata de miloj da gruoj, Ili kutime faras paŭzon en sia migrado ĉe la suda parto de la lago. Pasintjare, la 6an de aprilo, oni kalkulis 15.400 gruojn. La birdoj faras bruegon per sia trumpetado dum sia pariga dancado. La vizito al la lago estis ege agrabla travivaĵo. Mi sincere rekomendas viziton al tiu loko je iu ajn tempo dum la jaro. Oni ĉiam spertas ion novan je la vizitoj. 


KaGu, Skövde


Kunmetaĵoj:
ag·ad·o | akcept·ej·o | al·port·i | bedaŭr·ind·e | bru·eg·o | ĉas·ad·o | ĉas·ant·a | ĉirkaŭ·aĵ·o |danc·ad·o | de·met·i | dren·ad·o | ek·de | ek·i ekspozici·ej·o | en·ir·ej·o | esplor·rigard·i | estr·ar·o | financ·ad·o | fiŝ·agl·o | fiŝ·kapt·ant·a | gast·artikol·o | ge·patr·oj |graf·land·o | halt·ig·i | inform·foli·o | konstru·aĵ·o | konstru·it·a | kov·at·a | kun·e | kun·lig·e | leg·ebl·a | lok·it·a | mal·jun·a | mar·bord·o | migr·ad·o | migr·ant·a | montr·o·fenestr·o | natur·protekt·ant·a | observ·ej·o | par·ig·a | pas·ig·i | pas·int·jar·e | person·ar·o | prepar·it·a | protekt·it·a | publik·ig·i | respond·ec·i | restaŭr·ad·o | rezerv·ej·o | sekv·ant·a | sen·kost·e | ŝveb·flug·i | tra·viv·aĵ·o | trov·at·a | trov·iĝ·i | trumpet·ad·o | unu·a | ung·eg·o | util·ig·i | vizit·ant·o | vizit·at·a | voj·et·o 

Montag, 5. März 2012

Miaj plej ŝatataj androidaj aplikaĵetoj


Androidaj smartfonoj estas liverataj kun kelkaj interesaj kaj utilaj programoj. Sed, kompreneble, tiuj ne sufiĉas por la bezonoj de la plej multaj personoj, aŭ oni deziras programojn, kiuj pli bone akordas al la personaj sento kaj kutimoj.

Mia ĉefa aplikaĵeto estas »MessagEase« (http://www.exideas.com). Ĝi anstataŭas la originan klavaron, kiu estas tro malgranda por miaj vere ne gigantaj fingroj. Ĉe »MessagEase« nur la plej oftaj literoj ricevis propran klavon, la aliaj literoj estas tajpataj per glit-tuŝo de unu litero al alia. Sur la germana klavaro mi havas ekzemple la literon »d« en la mezo de la klavaro, kaj »r«-on dekstre apud ĝi. Tiujn mi povas simple prem-tuŝi. Por tajpi »m«-on, mi glit-tuŝas de »r« maldekstren al »d«. Glit-tuŝo de »d« al »r« kreas la literon »b«. Speciala klavo ŝaltas de tajpado de literoj al tajpado de ciferoj, specialaj glit-tuŝoj vidigas specialajn signojn aŭ ŝaltas al tajpado de majusklaj literoj. Per »Messagease« mi tajpas ne pli rapide, sed pli senerare.

La bildon afable disponigis al mi exideas.com.
Ekde kelkaj jaroj mi serĉas programon, per kiu mi povas administri ĉiutagajn aŭ iam-tiamajn taskojn kaj farendaĵojn. Por androido mi fine trovis aplikaĵeton, kiu almenaŭ ekde pluraj tagoj memorigas min pri taskoj kaj datoj: »Tasks To Do« (www.refined-apps.com). Simpla, sed efika. 

»Whatsapp« (www.whatsapp.com) estas vere fama tujmesaĝilo, kiun uzas preskaŭ ĉiu el miaj konatoj, kiu havas androidan smartfonon. Se ekzistas havendaĵo por androido, tiam ĝi estas Whatsapp. Mi povas sendi ne nur mesaĝojn, sed same bildojn, dosierojn kaj eĉ la propran pozicion trovitan de »Guglaj Mapoj«. Ĝi funkcias per telefonnumeroj, tial oni ne devas havigi al si plian salut- aŭ kaŝnomon. Whatsapp traserĉas la kontaktaron de la smartfonon kaj komparas la tieajn telefonnumerojn kun tiuj de siaj uzantoj. Mi povas tuj vidi, kiu el miaj kontaktuloj aliĝis al Whatsapp, kaj sendi al tiu mesaĝon.

Ankoraŭ ne ekzistas vere bonaj kalendaraj aplikaĵoj por androido. En diversaj forumoj estas raportataj, ke la forumanoj atendas programojn, kiuj havas la nivelon de tiuj por Palm OS, kaj mi konsentas. Sur mia cifereca asistilo »Palm Treo« mi uzis »iambus Agenda«, kaj tiu estis bonega kaj ĝis hodiaŭ supera al ĉiuj androidaj programoj. Tamen, mi bezonis iun aplikaĵeton, kiu estas pli bona ol la gugla, kaj tiu estas »Business Calendar« (http://www.appgenix-software.com). Ĝi tre bone interlaboras kun la reta kalendaro de guglo.

Malpli grava aplikaĵeto estas »GPS Test« (http://www.facebook.com/GpsTest), kiu ne estas precipe havenda, sed agrabla ludilo por konstati, kiom da satelitoj de la tuttera pozicitrova sistemo GPS estas uzeblaj por detemini la pozicion, aŭ por vidi, kie sur Tero mi aktuale troviĝas. 

»Cool Reader« (http://sourceforge.net/projects/crengine) estas mia programo por legi elektronikajn librojn. 

Bona ilo por ŝpari elektran povon estas »Timeriffic« (http://rdrrlabs.com). Per ĝi mi malŝatas por la nokto la aliron al mia hejma sendrata komputila reto kaj la poŝ-telefonan konekton.

Tiuj ne estas ĉiuj aplikaĵetoj, kiuj mi elŝutis el la androida merkato de guglo, sed tiuj, kiuj estas plej gravaj kaj ĉiutage uzataj. Iuj estas haveblaj ankaŭ por aliaj smartfonaj sistemoj kiel tiuj de Nokia, BlackBerry kaj iPhone. Ĉiuj aplikaĵetoj estas haveblaj en la androida merkato de guglo (market.android.com).


Kunmetaĵoj:
al·iĝ·i | al·ir·o | aplik·aĵ·o | aplik·aĵ·et·o | asist·il·o | bon·eg·a | cifer·ec·a | ĉiu·tag·a | ek·de | el·ŝut·i | far·end·aĵ·o | forum·an·o | hav·ebl·a | hav·end·a | hav·end·aĵ·o | hav·ig·i | inter·labor·i | kaŝ·nom·o | klav·ar·o | kompren·ebl·e | komput·il·o | kon·at·o | kontakt·ar·o | kontakt·ul·o | liver·at·a | lud·il·o | mal·dekstr·a | mal·grand·a | mal·pli | mal·ŝat·i | memor·ig·i | pozici·trov·a | raport·at·a | salut·nom·o | sen·drat·a | sen·erar·e | ŝat·at·a | tajp·ad·o | tajp·at·a | telefon·numer·o | tra·serĉ·i | trov·iĝ·i | trov·it·a | tuj·mesaĝ·il·o | tut·ter·a | uz·ant·o | uz·at·a | vid·ig·i