La aplikaĵo "puter.com" (disŝirita "com.puter") estas retumil-baza, interreta laborloko. Unuflanke ĝi estas atentinda paŝo al sendependigo de interreta laboro disde fiksa laborejo, aliflanke ĝi montras la limojn kaj mizerojn de "libera", "malferma" kaj "senpaga" softvaro (FOSS).
Kio do estas "puter.com"?
"puter.com" asertas pri si mem, ke ĝi estas kompleta komputero en retumilo, funkcianta per libera softvaro, senpaga, plena je funkcioj, rapida kaj etendebla. Fakte ĝi ne estas komputero, ĉar ĝi ne mastrumas la aparataron nek la operacian sistemon, sed ĝi estas labortablo kun programoj kaj retaplikaĵoj. Ĝiaj kapabloj dependas de la baze uzata komputero kaj ties retumilo. Ĝi storas dosierojn en sia propra nuba storo, oni povas elŝuti kaj alŝuti dosierojn.
Havante retspacon, vi povas establi tute sendependan propran laborlokon. Tiucele vi elŝutas la dosieraron el Github kaj instalas ĝin je via retejo.
Kiom kostas "puter.com"?
La uzado estas sen kostoj. Vi ricevas unu gigabajton da storo, sed vi povas aĉeti pli da storo (monata kotizo: 100 GB = 10 $, 500 GB = 25 $, 2 TB = 50 $).
Kiel oni uzas "puter.com"?
Kiam vi unuafoje lanĉas "puter.com"-on, ĝi aŭtomate asignas al vi nomon kaj konton. Oni povas krei propran kontonomon kaj ligi ĝin al tiu aŭtomata konto. Sur la supro de la laborloko estas langeto, kiu enhavas kelkajn administrajn kaj mastrumajn opciojn.
Tuj post la lanĉo estas je via dispono:
- Startmenuo (demetejo de aplikaĵoj)
- Foliumilo de dosieroj
- Aplikaĵaro (magazeno de aplikaĵoj): ekstraj elŝuteblaj aplikaĵoj
- Programiloj de aplikaĵoj por "puter.com"
- Notlibro
- Redaktilo por programado
- aplikaĵo por registrado de fotoj kaj videoj (tamen nur por la enkorpigita kamerao, mian duan kameraon ĝi ne ekkonis)
- sonregistrilo
Estas aliaj aplikaĵoj, kiuj indas elŝuti kaj uzi:
- Viewer: Vidigo kaj prilaboro de fotoj
- Player: vidigilo de videoj
- Grist: tabelkalkulilo
- PDF: PDF-legilo
- Photopea: enreta prilaborilo de fotoj
- Calc: kalkulilo
- PuterZoom (sinanonco: Zoom / Discord style video call): Jitsi-klono por videobabiladoj?
Miaj spertoj:
PuterZoom tute ne havas iujn agordojn. Mi ne sukcesis starigi konekton al dua komputero. Nun mi ne scias, ĉu ĝi vere taŭgas por videobabiladoj, aŭ ĉu ĝi estas (nefunkcianta) telefono.
WordPad prezentis sin per ĉina skribo. La menuo vidigas la programtekstojn (header.title ktp.), evidente mankas la menutekstoj apartenantaj al la aplikaĵo.
La kanban-tabulo estas relative simpla vidigo pri progreso de projekto kun tri listoj: farendaj, aktualaj, finitaj taskoj. Mi ne povas difini aŭ aldoni proprajn listojn. Tre grave: Mi povas analizi la projekton per AI. Eĉ por tute malplena tabulo sen iuj taskoj la analizo daŭras longe … kaj estas longa. Kiel kutime: La aplikaĵo estas en angla lingvo. Mankas agordoj, dokumentoj, helptekstoj.
Browser-light: Mi povis voki "esperanto.de" kaj aliajn retpaĝarojn. Pluraj aliaj retpaĝaroj ne estas vokeblaj: "Uh oh! We couldn't fully download everything we needed :( We will try again shortly. In the mean time, check for problems with your Internet connection!"), aliaj estas fuŝitaj, aŭ la Microsoft-serĉilo "Bing" intermiksiĝas, kvankam mi uzas la guglan retumilon. Nu jes, mi uzis retumilon ene de retumilo.
La bona mesaĝo estas: Vi povas mem elekti la aplikaĵojn, kiujn vi volas aŭ devas uzi.
La malbona mesaĝo estas: Vi devas mem elekti pli malpli ĉiujn aplikaĵojn, kiujn vi volas aŭ devas uzi. Kutime oni ne scias, kion la aplikaĵoj faras, ĉu ili taŭgas por la celo.
Laŭ intenco puter.com evidente similas al Microsoft 365 und precipe ChromeOS, kiuj same enkorpigas kaj unuigas nub-storon kaj enretajn aplikaĵojn kaj pli kaj pli progresemajn retajn aplikaĵojn (PWA).
Resumo: "puter.com" estas bona ideo por laboro, se vi volas storadi ĉiujn dokumentojn kaj datumojn en interreto kaj senŝoke (germane: stoßfrei) ŝanĝi komputeran laborejon al alia loko sen porti aparaton kun vi. Mi skribis komence, ke ĝi montras la limojn kaj mizeron de libera kaj senpaga softvaro: Jes, la aplikaĵoj estas bunta salato karakterizita per manko de gvidiloj kaj helpodokumentoj, parte neklaraj tasko kaj funkciado. Ĉiu povas fari programon por "puter.com", kaj ĉiu signifas: Mankas kontrolo pri bezono (eble jam ekzistas tri aplikaĵoj por la sama tasko), pri kvalito (ĉu la programo vere funkcias, ĉu ĝi estas facile uzebla kaj regebla), pri helptekstoj kaj aliaj dokumentoj ktp. Ne estas reguloj pri la grafika fasado, ĉiu planas kaj desajnas sian aplikaĵon laŭplaĉe.
